Ai Ansah

Nyadi tu teks leka main ai ansah ti dikena aku ngangkatka Sapit Kepala Menteri Sarawak, Datuk Patinggi Tan Sri Dr. Alfred Jabu anak Numpang lebuh iya ke deka bejaku ba pengerami makai lemai Seminar Budaya Iban di Betong kena taun 2015 tu tadi.

AI ANSAH

Nya alai kena aku ngepunka rurun leka main Iban,

Dulu aku meri selamat ngagai kita ke bekemunuk duduk betipan,

Nyangka jaku aku bisi pabu enda dalam,

Anang guai ga kita terus nyukat ngambi penyuran,

Sema penemu enggi aku enda menuku nadai meruan,

Aku minta padahka kita ke datai mayuh beraban,

Ke duduk bekelenuk nyau beserak.

Ai pait enggi aku tu enggi apai Sabit Bekait,

Datai ari bukit Gunung Metang,

Ai sekeru gela aku batu selit lanji-lanji,

Niti besi batang paip nengah rarit tiang balang,

Gurung-gurung masuk tung tikam enggau rempah limau rakit,

Campur mimit gula lalang.

Engkah di sarah tudung rapit-rapit,

Pantang enggau lawing paku mit,

Chimit nadai meranggang,

Dikena kitai nerantingka dabung rapit,

Diirup enggau mulut diempit enggau kanit,

Bisi manis mimit bechampur enggau pait,

Masam mekang-mekang.

Agi ga ai dikumbai aku ai serabat pakau kawat baka jelap daun api,

Ai buah tu anggur mirah keterubah nyadi berandi,

Ukai enda diturunka bilun kapal besi nyerumba sebun ambun pagi,

Terengkah di sebelah padang kerembai bekuang tikai peredani,

Lalu ditepanka ba langkan kemudi lori,

Sereta sangkai tanah seberai Betong lelanji,

Lalu simpan ke dalam kedai Chuan seduai tauke Ah Tee.

Nya alai ke lemai tu Datu Patinggi,

Tak merenchit tu mimit ari burit jebul besegi,

Ngeluah dikelansah tikai peredani,

Dikena aku ngansah tatah dabung gigi enggi nuan Datu Patinggi,

Ngambika nekis nyaris inggar bemunyi,

Disemaka ngagai panjung niang Munan apai Umi,

Lebuh tinda iya ngetanka kuta Sadok lelinang.